Afrikaans word 100: FAK vier met vreugdevure
Dié vereniging het ‘n reeks aktiwiteite waarvoor lesers kan inskryf om die taal se 100-jarige bestaansjaar te vier.
POLOKWANE – Die Federasie van Afrikaanse Kultuurvereniginge (FAK) is die oudste Afrikaanse kultuurorganisasie, wat hulle daaraan toewy om die taal en kultuur te beskerm.
Jaarliks word daar projekte aangebied waar deelnemers kan deel in die pret van Afrikaans. Hierdie jaar vier Afrikaans sy 100ste bestaansjaar en dus het die FAK ‘n spesiale projek geloods.
Deelnemers kan ‘n standbeeld ontwerp wat Afrikaans 100 uitbeeld. Daar sal ook ‘n kuns uitstalling op 14 Augustus wees met die Taaldagvieringe.
Tydens ‘n onlangse besoek aan Polokwane het die FAK kultuurnetwerkkoördineerder, Charles Rademeyer vertel van die verskillende projekte wat die FAK aanbied.
“Met die Olimpiese Spele wat tans aan die gang is, bied ons Taallimpiese Spele aan. Dit is Olimpiese Spele vir taal.”
Dit word oor dieselfde tyd as die Olimpiese Spele in Frankryk aangebied en sal vanaf hierdie jaar ook elke vier jaar plaasvind.
“Die doel hiervan is om pret in jou taal te hê. Die fisiese Taalspele vind op 3 Augustus by die Voortrekkermonument plaas, maar lesers kan ook aanlyn inskryf. Die aanlyn kompetisie is van 26 Julie tot 11 Augustus.”
Daar is ‘n verskeidenheid pryse te wen by die fisiese Taalspele, insluitend ‘n Taallimpiese Spele-wisseltrofee en ‘n midweek by die FAK Udolpho Rivierplaas in Parys.
Lesers wat aanlyn wil speel, staan die kans om ‘n R500 Takealot geskenkbewys te wen asook sertifikate en ‘n Taallimpiese Spele-wisseltrofee.
Navrae: lieandri@kultuurtuiste.org.za
‘n Ander gunsteling is die Geskiedenis Olimpiade wat internasionaal plaasvind.
Dit vind hierdie jaar vir die vyfde keer plaas en is ‘n aanlyntoets vir leerders van so jonk soos vier jaar, tot 18 jaar.
Daar is jaarliks ‘n tema en 2024 se temas is die Eerste Vryheidsoorlog (1880-1881) en die Anglo-Boereoorlog (1899-1902).
Die olimpiade vind oor twee rondtes plaas – die eerste ‘n aanlyn toets waar die kandidaat ten minste 80% moet kry.
Die tweede rondte is by ‘n uitdunnaweek op die FAK plaas, Udolpho Rivierplaas, Parys.
“Skole wen groot pryse soos R20 000 en daar is ook beurse by Akademia en Wolkskool op die spel.”
