POLOKWANE – “Lulu, jy mag maar ‘n lifeguard word,” is hoe Annelie Espag onlangs speels vir haar sussie, Luandrie, na dié se heldedaad by ‘n kinderpartytjie geprys het.
Luandrie, ‘n 10-jarige leerder by Oosskool, vertel nederig hoe sy daarna ook as Osie van die Maand aangewys is.
Dié toekenning gaan aan ‘n Oosskoolleerder wat die skool se waardes ten toon stel, sonder om noodwendig ‘n belonging te ontvang.
Luandrie, wat ook baie nederig oor haar weldaad is, was saam met haar ma, Liani, om vir Annelie by ‘n partytjie te gaan haal.
Sy en ander kinders was rondom die swembad, wat met ‘n seil bedek is, toe die volwassenes ‘n geskree hoor.
Luandrie vertel dat daar ‘n driejarige dogtertjie was “wat gedink het sy kan oor die seil loop”.
“Sy het net ingesink, en ‘n bietjie opgekom, en toe gryp ek haar aan haar arms en haal haar uit die swembad uit. Sy het in die diep kant ingeval, maar gelukkig kan ek swem.”
Haar ma onthou hoe sy besig was om Annelie se goed in haar sak te sit toe hulle die gil hoor.
“Ons het na buite gehardloop waar ons gesien het Mia*(3) is papnat. Haar ma het haar badkamer toe geneem waar sy haar in handdoeke toegedraai het. Toe ek vir Luandrie vra wat gebeur het, antwoord sy ‘Mamma, ek het Mia gered. Sy het reguit ingeval en haar kop was amper onder die water en toe gryp ek haar arms en trek haar uit. Ekskuus mamma, ek is ook nou nat.’”
Na die episode was almal nog in die badkamer met Mia besig om agter die kap van die byl te kom, toe Annelie, met trots, vir haar sussie sê sy moet ‘n lewensredder word.
Dit het die ergste spanning gebreek en almal het gelag.
Luandrie vertel sy is ‘n gewone 10-jarige wat daarvan hou om TV te kyk, te verf en fiets te ry. Sy neem graag deel aan karate.
“Dit was vir my lekker toe ek die toekenning kry. Dalk word ek eendag ‘n swembad-lewensredder,” sê sy.
Mia se ouers het Luandrie geprys en bedank vir haar heldhaftigheid en sê hulle is haar ewig dankbaar.
* Regte naam weerhou op versoek van die ouers.