Kleinhoewe loop deur onder boosdoeners
Kameras op die Oorlogsfonteinkleinhoewes het ‘n verdagte vasgevang waar hy toegang tot die elektriese kabel verkry het.
MOKOPANE – Inwoners van die Oorlogsfonteinkleinhoewes is woedend nadat boosdoeners die afgelope week kabels gesteel het en transformators geplunder het.
Kameras in die omgewing het ‘n verdagte vasgevang waar hy toegang tot die elektriese kabel verkry het. Die alarm het afgegaan en die verdagte het spore gemaak.
Brendon Williams, ‘n Arend Bergwaglid sê die bergwaglede, die Heritage Protection Group (HPG), Basoppa Sekuriteit en Afriforum is kort na die voorval uitgeroep na die toneel, waar die span spore van die verdagte vergelyk het met vorige tonele van diefstal.
“Ons het die spore gevolg tot by nabygeleë werkerskwartiere op Oorlogsfontein waar die verdagte gekonfronteer is en mates is van sy skoengrootte geneem voor die span terug is na die toneel waar die kabels geknip is. Ongelukkig het die Mogalakwena Munisipaliteit se werkers, wat die kabels intussen kom herstel het, die spore vertrap en kon die span nie die verdagte se skoengrootte identifiseer nie. In die lig van al die gebeure vra ek dat die inwoners moet belê in kameras, sodat die boosdoeners op heter daad betrap kan word. Ons het bewyse nodig, en die kamera se sirene is ‘n goeie afskrikmiddel.”
Williams sê dat die Arend Bergwag lede met die polisie in kontak was en dat dié bevestig het dat dit nie altyd moontlik is om die verdagtes te vang nie, “maar solank die boosdoeners weet ons is paraat en ons weet van hulle, sal hul hopelik skuif na ‘n ander area, en ook as hul sien dis nie meer so maklik nie. Dit is ons elkeen se plig en in sy eie belang om die area te beskerm.”
