Hou ‘reünie’ saam met Frank Opperman

POLOKWANE – Die N.G. Kremetartgemeente bring vanjaar Frank Opperman se ‘Reünie’ na Polokwane.

Stel jou voor ‘n skoolreünie, waar elkeen ‘n spreekbeurt voor die mikrofoon kry en in ‘n hanswors verander.

Dit is dieselfde skoolsaal, maar dit is 44 jaar later vir die 1980-matriekgroep.

Dit is tyd vir hul 40 jaar-reünie, maar weens die Covid-pandemie kan hulle dit eers vier jaar later hou.

Die reünie word beleef deur die oë van Petrus Boshoff (Frank Opperman), wat as verteller optree. Basies gaan dit oor ‘n klomp mense vir wie jy darem een keer in jou lewe iets moet sê wat jou gepla het.

Sommige spreekbeurte is humoristies, ander dieper, veel meer ernstig en besinnend.

Vier-en-veertig jaar gelede het almal saam ‘n tragedie beleef wat hulle nou vir die eerste keer gesamentlik konfronteer. Met ‘n koelboks, die hulp van ‘n skoolbaadjie, ‘n paar trefwoorde en ‘n ander stemtoon gee Frank gestalte aan 15 verskillende karakters.

Dana Snyman en Frank Opperman het al verskeie kere kragte saamgesnoer in die skep van eenmanstukke.

Met Reünie is die sterk regisseurshand van De Klerk Oelofse bygevoeg.

Die vertoning vind op 12 Julie om 19:30 plaas. Kaartjies beloop tussen R150 en R180. Sitplekke is beperk. Kaartjies is beskikbaar by die kerkkantoor of 015 295 8849 of by Veritas Rekenmeesters by 015 590 1000.

Vanaf 15:00 op dieselfde dag vind daar ‘n mini-basaar plaas met lekker kos, gebak, geskenke en ‘n tombolatafel.