POLOKWANE – Inwoners oud en jonk het die naweek die Skaap en Skoffelfees wat by General Piet Joubertskool se sportgronde gehou is, bygewoon.
Uitstallers het hulleself goed geposisioneer om die maksimum blootstelling uit feesgangers te kry, met biltong, organiese produkte, boetiekklere, verversings en selfs perderitte op die inkopiespyskaart.
Bekende Afrikaanse kunstenaars, Arno van der Hoff, Djackalaas en Bolv Boere Orkes, Francois Jacob, Elizma Theron, Liezel Pieters, Sorina Flooze, Ivan Roux, Dodo, Heidi, J Morgan, Adam, Nicholis Louw, Loufi en Gerhard Steyn was groot trekpleisters, terwyl Didi, Dienkie en Doedels en die Tjominis die kinders besig gehou het.
Stoei- en boogskietkompetisies was ook deel van die vermaakprogram.
Die organiseerders van die geleentheid, Yolandie Peters en Jaenette Jacobs sê hulle was beïndruk met die opkoms, en baie dankbaar vir elkeen wat die pret kom opsoek het.
“Dankie, Polokwane vir julle ondersteuning. Hierdie fees sou nie moontlik gewees het as dit nie vir elkeen was wat ‘n kaartjie gekoop het nie,” het Peters almal bedank.
