POLOKWANE – Die jong Gavin van Kasterop (2) is reeds meer as twee weke in die hospitaal nadat hy met leukemie gediagnoseer is.
Hy is in die Tough Living with Cancer (TLC)-saal by die Pietersburg Provinsiale Hospitaal opgeneem waar hy chemoterapie begin ontvang het.
Lees ook: Hulp gevra vir 2-jarige Gavin wat aansterk in TLC-eenheid
Dit het aanvanklik goed gegaan, maar ‘n paar dae gelede is die terapie stopgesit aangesien Gavin se teenliggaamtelling baie laag is.
Dit sou beteken die chemoterapie breek net nog meer teenliggaamselle af en dus kan dit nie die virus- en bakterie-infeksies keer nie.
Gavin se ma, Marlize sê hy het Maandag ‘n bloedoortapping ontvang.
“Ons sou die uitslae van sy infeksietelling ook gister gekry het, maar ons het nog nie, en ons glo dit beteken goeie nuus. Jesus is wonderlik en ons glo en bid en weet ons is naby die einde van hierdie berg. Gavin is ‘n vegter en ons weet hy gaan deurdruk tot hy gesond is. Ons as ouers het seer vir sy onthalwe, maar ons is vol vertroue dat die Here hom gaan gesond maak.”
Gavin is in ‘n geïsoleerde kamer waar Marlize dag en nag by hom sit.
Die gesin het ‘n pleidooi gelewer, en gevra vir gebede vir Gavin.
“Ons glo met gebed sal hy, en ander kinders, genees word. Ons vra die gemeenskap om saam met ons te bid.”
