POLOKWANE – René Robberts (57) het diep spore in die gemeenskap getrap, veral met haar liefdevolle versorging van siekes en haar bereidwilligheid om altyd en oral te help.
Sy is op 5 Julie in haar slaap oorlede.
Een van haar vriendinne en kollegas, Mariza Pelser, onthou haar as ‘n sonskynmens.
“Sy was my hoop en ek kon ons weerlooste mense met die grootste nood met ‘n geruste hart in haar hande los, waar sy dan wondere verrig het. Sy was vir my so ongelooflik kosbaar – ons gereelde oproepe en stemboodskappe om net gou op te vang, haar idees oor hoe om mense te help, sy het my net soveel geleer.”
Mariza verduidelik hoe René in ‘n ondankbare werksomgewing fantastiese resultate kon lewer.
Sy het nie opgehou probeer totdat sy reggekry het om pasiënte te help vermag wat sy geglo het hulle kon nie, vertel sy.
“Haar vermoë om die beste uit mense te haal het my stomgeslaan. Sy was ‘n paar weke gelede op ‘n vrouekamp en met haar terugkoms het sy by my gestop en haar eerste woorde aan my was, ‘God het my antwoorde gegee!’. Sy het ‘n groot verligting en rustigheid oor haar gehad.”
Die mense met wie René gewerk het, voel leeg na haar heengaan. Sy het tuisversorging gedoen, maar min mense weet sy het pasiënte ook gehelp met wasgoed, kosmaak en huis skoonmaak.
“Ek moes baie baklei omdat sy meer ure gaan werk het, as waarvoor sy vergoed was. Maar sy het gaan sekermaak haar mensies is veilig en rustig. René was liefde, veilig, hoop, dankbaarheid, ‘n lekkerlag- en afpakvriendin en ‘n planmaker met deursettingsvermoë. Ek gaan haar so baie mis.”
Corné Marais het destyds saam met René by Cansa gewerk, en onthou hoe geesdriftig sy oor die lewe en haar werk was.
“Sy was altyd bereid om te help waar sy kon, en sou met gemak die ekstra myl stap.”
Leer meer oor René Robberts in vandeesweek se Polokwane Observer.
