POLOKWANE – Stefan Geyser (15) se wintervakansie het op ‘n slegte noot begin nadat hy in ‘n tref-en-trapongeluk betrokke was.
Volgens sy ma, Lizelle, het Stefan met sy fiets in Doornkraalstraat gery tot die voorval gebeur het.
“My jongste kind, George Kelly (8) is siek en Stefan het na die veld aan die onderkant van Doornkraalstraat gery waar daar plante groei wat gebruik kan word om kindersiektes te behandel. Met die terugkomslag het ‘n motoris in Witklipstraat die verkeerslig verontagsaam en die fiets se agterwiel getref. Die lig was groen vir Stefan. Met die impak moes Stefan uitswaai wat veroorsaak het dat hy val en die fiets het oor hom geval. Hy het ‘n muur getref.”
Na die ongeluk kon Stefan, met ‘n stukkende lyf, tot by sy huis ry waar sy ouer suster, Nikita, vir Lizelle gekontak het.
Tuis het sy ‘n bebloede Stefan aangetref. Hulle is dadelik na die hospitaal toe waar hy steke in sy gesig en op drie plekke op sy skouers moes kry. Hy het drie ribbes gekraak en daar is baie kneusplekke aan sy lyf.
Die plaaslike polisie, volgens Lizelle, wou nie ‘n saak oopmaak nie aangesien die omvang van die beserings eers bepaal moet word.