MOOKGOPHONG – Die skool het hul eerste van vele Matriekafskeid Ekspo’s aangebied waar Armand du Plessis, voormalige Mnr. SA, Carre-Lee Armstrong, Mej SA Rolmodel en Jaenette Jacobs, wenner van Sterstatus 2020 hul debuut gelewer het.
“Die doel van die ekspo was om blootstelling vir nie net matriekmeisies nie maar vir enige meisie te gee vir haar droomdag. Soos almal weet is daar twee droomdae in enige meisie se lewe, haar troudag en haar matriekafskeid,” sê onderwyser, Marita Louw.
Sy verduidelik dat daar nie ‘n verskeidenheid van ontwerpers in die area is nie, maar wel baie somatoloë en skoonheidsterapeute. Die organiseerder, Corlia Boshoff, het dit goed gedink om ontwerpers van heinde en verre asook skoonheidstegnikuste te nooi. Die dag se fondse gaan aangewend word vir die Hansies se matriekafskeid later vanjaar.
Ongeveer 130 mense het die ekspo bygewoon en 30 skoliere van Hoërskool Hans Strijdom het opgetree as modelle vir die verskeie rokke. Teen die einde van die dag is besoekers beloon met pryse wat deur die uitstallers geborg is. Daarna kon hul lekker om die koektafel of selfs die gin kroeg verder kuier.
Die Hansies bedank die uitstallers sowel as die ontwerpers, Claris by Gerrit Pienaar, Smart Bride & Smart Guy, Kyna Consili, OBD & Co, Sparkle Designs en Blossom Fashion vir die dag se sukses.
