Plaaslike inwoner behaal TikTok-roem

POLOKWANE – TikTok het tydens die inperktyd ‘n gonswoord onder mense geword. Die sosiale media platvorm het gou vir talle ‘n tydsverdryf geword, terwyl ander roem en selfs loopbane daaruit geskaaf het. 

Plaaslike inwoner, Mischa Becker, het gou die platform bemeester en het reeds 109,3 duisend aanhangers. Buiten hiervoor, spog sy ook met 12 000 aanhangers op Instagram.

“My deelname aan TikTok het begin toe ek vir die grap videos begin plaas het. Spoedig het mense dit snaaks gevind en my aanhanger-getal het gegroei,” noem sy.

Mischa vertel hoe sy kuberboelies hanteer en getrou bly aan haarself.

“Ek glo daarin om boelies net te ignoreer en hulle nie tyd of aandag te gee nie. Ek sal hulle eerder emosioneel ondersteun as om hulle terug te beledig. Ek het geleer om jouself eers in iemand anders se skoene te plaas. Ek wil eerder help en fokus op die positiewe, ek wil nie mense seer maak nie.”

Mischa het haar eie sê-ding ontwikkel.

“Dikwels wanneer mense wil skinder, of as iemand sappige nuus het, word daar gesê ‘spill the tea‘. So het my sê-ding ‘Ek het tee…’ geword,” voeg sy by.

Sy bieg dat sy die roem geniet.

“Om te weet ek is iemand na wie mense opkyk, is lekker. Daar is tog ‘n groot verantwoordelikheid aangesien ek heeltyd moet kyk wat ek sê en hoe ek optree. Soos ek op die skerm is, so is ek in die regte lewe. Wat jy sien is wat jy kry. In ons huis het ons geleer om aan ander te doen wat jy aan jouself gedoen wil hê.”

Met ‘n hart vir veral tieners het Mischa raad aan ander wat in haar voetspore wil volg.

“Wees net jouself. Moet nooit dink jy is nie goed genoeg nie. Dit help nie jy sit ‘n gesig op as jy nie so is nie. Wees eerlik en moet nie ander mense afkraak nie.”

Mischa werk by Papillion Art and Crafts en vertel sy kry dikwels kliënte wat haar herken en dan saam met haar foto’s wil neem. Sy word selfs in Pretoria en Vereeniging raakgesien.

Lees meer oor haar in volgende week se Polokwane Review.