POLOKWANE – “Gebed dra krag! Biddend op my knieë is wat my deur hierdie pad gedra het,” vertel Rita Podges.
Kort na haar pa se dood het sy ‘n knop in haar bors gevoel. Sy is dokter toe, waar hy haar ondersoek het en daar is verskeie toetse gedoen. Rita is daarna gediagnoseer met aggressiewe borskanker en moes dadelik begin chemoterapie ontvang.
Sy vertel dat haar pad na herstel begin het met ‘n brief van haar twee 10-jarige kleindogters. “Hulle woorde sal my altyd bybly. ‘Oom Louis bid asseblief vir my ouma.’ Ons het gehuil oor dié kinderlike boodskap.”Die chemobehandeling was ‘n moeilike pad vir Rita.”Ek was baie siek en het in drie weke 16 kg en al my hare verloor. My hande, voete en naels was swart soos die chemo my gebrand het. Ek kon nie loop of aan iets met my hande vat nie. Ek is terug dokter toe waar ek op ‘n voedingsdrip gesit is. My dogter, Brenda Grebe, het ‘n oproep ontvang en buite gaan praat. Toe sy weer inkom het sy gehardloop en vir my gesê ‘n vriendin het vir haar woord gegee ek moet na dr. Zirk Jansen toe gaan. Die oomblik wat ek by hom ingestap het, het hy my ‘n druk gegee en gesê hy het vir my gewag. Sy woorde aan my was ons gaan ‘n pad in geloof stap. Toe het ons met nuwe chemo begin.”In hierdie tyd kry sy darem ‘n eetlepel hoendersop geëet aangesien haar mond en keel vol sere was en sy nie eintlik kon sluk nie. Sy vertel sy het nie ‘n benul van tyd gehad nie en sou sommer teen 02:00 gaan stort. Haar hele lyf was seer en sy het koors gehad.”Terwyl ek kouekoors gehad het, het my kleinseun by my op die bed kom lê. Sy liggaamshitte het my koors gebreek. My oë was vreeslik droog.” Haar man, Gert en kinders het haar ondersteun, en haar vriendinne ook.”Ek het nooit in hierdie tyd opgehou bid nie. My knieë was pikswart maar op my knieë het ek geweet en geglo God is besig om my gesond te maak.”Vroeg verlede jaar ondergaan Rita ‘n mastektomie en vier kort daarna die goeie nuus.”Ek was skoon. Ek wil vir ander sê, bly op jou knieë. Al verwyder hulle jou bors, verwyder hulle nie jou hart nie. Die hele proses was baie sleg vir my familie, maar ons is sterker en beter daardeur.”
