Rita gesels oor ‘n koppie boeretroos en beskuit
My ouma het geglo dat geen mens 'n koppie boeretroos kan geniet sonder varsgebakte beskuit nie.
POLOKWANE – Soveel jong mans is grens toe gestuur met ‘n blik beskuit en oor menigte koppies koffie saam met beskuit, is daar gesels oor wat in die dorp gebeur. Beskuit beland nou nog in vele inkopiemandjies.
Beskuit is ‘n eg Suid-Afrikaanse lekkerny en stories wil dit hê dat Ouma-beskuit reeds in 1939, tydens die Groot Depressie, sy ontstaan het. ‘n Dominee het aan vroue in die gemeenskap elk ‘n half-kroon gegee en hulle aangemoedig om te woeker met dié geld. Een vrou, Elizabeth Ann Greyvensteyn, het bestanddele vir die maak van beskuit gekoop en begin bak. Sy het begin om haar beskuit te verkoop en bestellings het ingestroom.
Augustus 2017 het ‘n soortgelyke storie hom in Polokwane afgespeel. Rita Geringer het besluit om met resepte te eksperimenteer en sedertdien stroom bestellings vir haar gebak in. Review het, met Erfenisdag (24 September) ingedagte, besluit om met Rita te gesels oor hierdie smulhappie.
“Ek het vir jare lank gewerk en na my aftrede besef dat ek moet besig bly. Ek bly op ‘n plot en die stilte het my gevang. Ek het gesoek na iets om te doen en my ma se resepteboeke nader getrek. Ek het gesoek na iets bekostigbaar en lekker.”
Rita het begin bak en haar gebak op markte begin verkoop.
“Dit was vir my heerlik, ek kon weer uitkom en het ou vriende weer raakgeloop.”
Rita noem dat sy gesondheidsbeskuit, anysbeskuit en egte boerebeskuit bak. Sy bak ook kleinkoekies en behalwe vir haar gereelde bestellings waar sy aan Spar Platinum Park en Vleislapa Welgelegen lewer, bak sy dikwels vir ander mense ook.
“Ek bak en verpak self die koekies en verkoop dit dan in emmertjies van 5l g of 1,8kg.”
Om Rita te ondersteun, kontak haar by 060 824 5301.
