POLOKWANE – Danae is een van die finaliste in die Mnr. en Mej. Heuwelkruinkompetisie.
Daar word 12 finaliste gekies wat dan opgedeel word in drie huise. Elke huis, of groep moet 10 ure se gemeenskapsdiens doen by liefdadigheidsorganisasies van hul keuse.
Danae is saam met Wian van Vuurren, Grant Steynberg en Natalie Rentroia in huis Triton.
Daar is ook twee gesamentlike projekte, naamlik Bergbou en Meals on Wheels. Al die finaliste werk dan saam om items in te samel. Met Bergbou help die res van die skool die finaliste om ou klere en toebehore bymekaar te maak en met die Meals on Wheels Projek word nie-bederfbare produkte ingesamel wat dan aan Meals of Wheels geskenk word.
Die finaliste het ook twee ander projekte gehad naamlik ‘n sopkombuis waar hulle vir minderbevoorregte mense sop gegee het en die opknapping van Adonai Children Centre in Westenburg se leersentrum.
“Ons het ook vir die kinders kolwyntjies geneem en klere wat ons met Bergbou ingesamel het. Ons het ook seep, sjampoe en badsponsies gekoop. Ons sal definitief meer betrokke in die gemeenskap raak om elke dag iemand se lewe te beinvloed.”
