Geliefde sakevrou Lynette Myburgh sterf
'n Bekende sakevrou en geliefde inwoner se afsterwe los 'n groot leemte in die gemeenskap.
MOKOPANE – Lynette Myburgh, mede-eienaar van Potties Besproeiing, is verlede Vrydag oorlede.
Saam met haar eggenoot, Neels, het sy Potties Besproeiing op 1 Maart 1989 geopen waar sy verantwoordelik was vir die administrasie en finansies. Die egpaar het ook in 2000 ‘n stukkie grond buite Potties gekoop en Naboomfontein-gastehuis begin.
Lynette (65) is in Potgietersrus gebore en was oral geliefd. Sy was bekend vir haar omgee en hartlikheid.
Sy was ook ‘n voorslag in die kombuis en talle inwoners het aan haar heerlike fudge en kerrie en rys gesmul wanneer die N.G. Suid basaar gehou het.
Haar familie sê sy sal onthou word as steunpilaar vir haar man en vir haar liefde en betrokkenheid by al haar kinders en kleinkinders. Sy was ook altyd daar om raad en leiding te gee vir ander. Haar roudiens word Vrydag om 11:00 vanuit die N.G. Hulp en Hoop Gemeenskapskerk gehou.
Sy laat haar man en vier kinders, twee aangetroude kinders, Marlize Pretorius, skoonseun Gert Pretorius, seun Bertus Myburgh, dogter Carmen Myburgh, Nols Myburgh en skoondogter Zetmari Myburgh na. Sy laat ook twee susters en ses kleinkinders na.
redaksie.bosvelder@nmgroup.co.za
