Mall of the North help kunstenaars met blootstelling

Besoekers aan Mall of the North het hulle die naweek in ‘n fees van kunswerke verlustig wat tydens die Just Imagine Arts & Photo Fair uitgestal is.
Mari Delport, bemarkingsbestuurder van Mall of the North, sê die doel van die uitstalling was om aan plaaslike kunstenaars en fotograwe ‘n geleentheid te bied om hul werke aan die publiek bekend te stel.
Eienaar van ‘n kunsskool en kunstenaar in eie reg in die stad, Marlize Kenmuir, het van haar werke sowel as ‘n verskeidenheid van haar studente se werke, uitgestal. Kunswerke van haar studente, Genise Robbertze, Ethan Bornman, Magderie Smit en Abigail Olivier, het veral aandag getrek. Nog een van Kenmuir se studente, Lené van As, wat eers verlede jaar begin skilder het, het tydens vanjaar se Tzaneen Eisteddfod, 95% vir haar kunswerk ‘Denim en rooi tekkies’ behaal.
Hercules Strydom, wat onder die naam Klaas uitstaan vir sy penlynsketse en werke in akriel, het gewys hoe hy met vaardige hale ‘n potloodskets die lig laat sien. “Ek is eintlik ‘n landskapsargitek maar sedert ek drie jaar gelede begin skilder het, het dit meer as ‘n stokperdjie geword,” vertel hy.
Annemarie du Plessis, voorsitter van die Pietersburg Fotografieklub, het besoekers aan ‘n keur van lede se beste foto’s voorgestel en fluks lede vir die klub gewerf. “Ons hou maandeliks ‘n vergadering waartydens lede se foto’s beoordeel word en hulle dan sterre van een tot vyf kry, waarna hulle tot magisterstatus in brons, silwer en goud in fotografie kan vorder.”

Storie en foto’s: BARRY VILJOEN
>>barryv.observer@gmail.com