Baba Jayden na Ga-Rankuwa vir operasie oorgeplaas
Jayden Deacon is Donderdagmiddag laat na die Dr George Mukhari Hospitaal in Ga-Rankuwa noord van Pretoria oorgeplaas waar hy nou behandeling ontvang.
POLOKWANE – Jayden se ouers, Rocky en Michelle, het hom onlangs na die hospitaal in Thohoyandou, waar die gesin bly, geneem nadat hy nie sy kos ingehou het nie.
Lees meer: Help jong ouers met mediese sorg vir hul baba
Jayden is nou ses weke oud en na verskeie besoeke aan die hospitaal en dokters, is hy vroeg Woensdagoggend na Mangkweng Hospitaal geneem.
Hier het dokters ‘n sonar gedoen en gevind dat daar ‘n tipe vergroeisel in sy maag is wat vergroot elke keer as hy eet wat dan daartoe kan lei dat sy maagkleppe nie toegaan nie. Dit veroorsaak dan dat die kos wat hy geëet het weer terugstoot.
Dit word hipertrofiese maagsluitspiervernouing (hypertrophic pyloric stenosis) genoem. Laat Donderdagmiddag is Jayden dus oorgeplaas na die Dr George Mukhari Hospitaal waar dokters pypies in sy neus gesit het om die slym wat in sy liggam is, te dreineer.
Michelle waak heeltyd langs sy bed en vertel dat die dokters hom op ‘n drip gesit. “Die dokters moet dringend op Jayden opereer en hulle het die drip opgesit en vir my gesê Jayden moet eers ‘n bietjie sterkter word voor hulle dit kan doen. Hulle opereer glo net Vrydae en Maandae hier by die hospitaal. Ek hoop en bid dat hulle hom vandag al sal kan opereer. Ek is nie seker hoe groot die vergroeisel is nie of wat dit veroorsaak het nie.”
Rocky kan weens omstandighede nie by sy vrou en seun in die hospitaal wees nie en vertel dat hy rasend van bekommernis is. “Ek sit hier in Thohoyandou en weet nie presies wat aangaan nie. Dit voel vir my asof Jayden net daar lê en dokters niks doen om hom te help nie. Ek wil hom bitter graag in ‘n privaat instansie hê vir gespesialiseerde en individuele sorg maar ons is nie finansieel instaat om dit te doen nie.”
Die gesin het Child Medi Organisation gekontak vir hulp met Jayden se mediese sorg en om hom na ‘n privaat hospitaal te laat oorplaas en dié organisasie het toe ‘n rekening vir Jayden oopgemaak.
Rekeningbesonderhede: Child Medi Organisation. FNB tjekrekening. Rekeningnommer: 626 325 810 56. Takkode: 250655. Swiftkode: firnzajj. Verwysing: Baba Jayden.
Diegene wat meer inligting verlang kan Child Medi Organisation per e-pos by info@childmedi.org kontak. Seksie 18(A) belastingsertifikate is beskikbaar vir individue en besighede wat ‘n finansiële bydra tot Jayden se sorg maak.
