MannheiM Pub and Grill in Ladanna se openingsaand Vrydag het bewys dat die stad nog steeds ‘n behoefte het aan ‘n veilige kuierplek waar gaste heerlike kos en ‘n verskeidenheid drankies teen bekostigbare pryse kan geniet.
Eienaars Rikus Steenberg en Joe Snow is dit eens dat hul spyskaart en onoortreflike diens in oud en jonk se smaak sal val en dat dié kuierplek, wat voorheen as Hoofkantoor bekend was, se besondere atmosfeer ‘n nuwe tuiste sal bied.
MannheiM Pub and Grill se ‘Sloppy Joe’ en MannheiMburger het reeds op die openingsaand groot byval gevind en van die jonger gaste het tot in die vroeë oggendure by die potspeltafels gekuier. ‘n Ontbyt bestaande uit spek en eiers, ‘n kaasworsie, skyfies en sous met roosterbrood is op die uitgebreide spyskaart wat ook roostergeregte, geroosterde toebroodjies, kaasburgers, ribbetjies en hoendervlerkies insluit. Happiebordjies (platters) sorg dat daar iets vir elkeen is om aan te peusel.
Steenberg sê dat MannheiM Pub and Grill se veilige parkeerplek een van die besigheid se bates is. “Kinders is ook welkom en ons beoog om dit ‘n kuierplek van keuse te maak waar gaste ‘n onvergeetlike bosveldervaring kan hê,” sê Steenberg.
Storie en foto’s: BARRY VILJOEN
>>barryv.observer@gmail.com
