Provinsie staar R7.6 biljoen regsgedinge in die gesig
Regter-president Ephraim Magoba het onlangs die skokkende onthulling gemaak dat die provinsiale regering regsgedinge ter waarde van R7,6 billjoen in die gesig staar.
POLOKWANE – Hy het hierdie stelling onlangs tydens die inter-provinsiale staatsregsadviseursforum gemaak.
Makgoba het die Limpopo-regering gekritiseer omdat hulle teen 80% van bevindinge van regsgedinge in die Hoërhof geappelleer het die afgelope twee jaar.
Die bevindinge is verder vererger deur’n verslag deur die Premier se kantoor wat bevind het dat daar meer as 1 000 siviele regsgedinge hangend is teen die provinsie.
Die Department van Gesondheid, Onderwys en die Limpopo Padagentskap is as die sondebokke uitgesonder wat meer dikwels deur werknemers, diensverskaffers en lede van die gemeenskap hof toe gesleep word.
Gesondheid is aan die bo-punt van die lys met 831 sake hangend, meestal vanweë mediese nalatigheid. Dié sake het vanaf 179 sake tot 831 toegeneem in ‘n tydperk van drie jaar.
Eise teen Onderwys het vanaf 376 tot 556 in dieselfde tydperk toegeneem. Die sake sluit in sake ten opsigte van kontraktuele eise, aanranding (lyfstraf) en beserings.
Vervoer het 160 eise as gevolg van slaggate.
Die Kantoor van die Premier en die Department van Samewerkende Regering, Behuising en Tradisionele Aangeleenthede het meerendeels eise oor tradisionele leierskapposisies.
Gesamentlike eise teen die Departmente van Gesondheid en Onderwys beloop meer as R6 biljoen.
Die DA meen die verslag bewys dat departementele regsspanne nie opgewasse vir hulle taak is nie.
Planne om die talle aksies te verminder sal glo net planne op papier bly, met geen oplossing vir die roekelose gedrag deur beamptes nie.
Kenny Mathivha, Woordvoerder van die Premier se kantoor sê die provinsiale regering is diep bekommerd oor die uitgawes op litigasie.
Hy sê dat netwerke vasgevat is waar die padongelukkefonds misbruik is en dokters met prokureurs saamgewerk het om ongehoorlike bedrae te eis.
