POLOKWANE – Sommige mense verkies om agter die skerm te werk en nie op die voorgrond te wees nie, maar wanner jy egter inskryf vir ‘n kompetisie soos Mev. Polokwane, neem jy ‘n doelbewuste besluit om uit jou gemaksone te beweeg.
Dit was die geval met Wilhelmiena Kkoutas, een van die Mev. Polokwane 2018 finaliste. Sy vertel hoe haar reis as finalis begin het.
“Ek het altyd gevoel ek is nie goed genoeg, maer genoeg en mooi genoeg nie, en toe ek die artikel raaklees van die Mev. Polokwane kompetisie, het ek besluit om in te skryf. My drome kon dalk nie altyd waar word nie, maar ek het besef dat ek iemand anders kan help. Ek wil ook hê my kinders moet na my kan opkyk.”
Sy vertel dat haar neef aan haar pa se kant Down Sindroom gehad het en dat sy dood haar diep aangeraak het.
Dus het sy besluit om betrokke te raak by La Wiida Leersentrum, ‘n sentrum waar na gestremde kinders omgesien word.
“Vandat ek met Mev. Polokwane betrokke begin raak het, kom ek meer in aanraking met gestremde mense of iemand wat hulp kort. Alles val net in plek.
Hierdie ma van twee meisies begin Maandag as ontvangsdame werk, maar droom daarvan om ‘n koffiewinkel met ‘n skoonheidsalon oop te maak. “In my vrye tyd bak ek trou- en partytjie koeke, maar ek geniet skoonheidsterapie vreeslik. Ek spandeer ook soveel as moontlik tyd saam met my man, Alexi,. En kinders.”
Sy vertel dat Alexi nog nie regtig besef dat sy wel ‘n finalis is nie en dat sy self glad nie verwag het om as een van die top 10 aangewys te word nie.
“Ek is net ek, hier om te doen wat ek kan doen.”
