‘Engelstem’ droom groot
Die jong nagtegaal van Hoërskool Pietersburg (PHS), Britney Tyler (14), maak groot naam in die vermaakbedryf met haar "engelstem" soos telke aanhangers op haar Facebookblad skryf.
POLOKWANE – Britney het vier jaar gelede begin om ‘n loopbaan as sangeres na te streef nadat een van haar vriendinne haar aangemoedig het.
“My vriendin, Milla Kampher, het my aangemoedig om te begin sing en, alhoewel sy nie self sing nie, het sy my inspireer en staan sy bankvas agter my sangloopbaan,” vertel Britney.
Se verduidelik dat sy al van jongs af lief vir sing en musiek was en dat haar pa deel is van ‘n boeremusiekorkes so sy het grootgeword met musiek in haar huis en haar siel.
“Ek het vier jaar gelede by JP Duvenage se Rock Hard Music School begin om formele sangonderrig te ontvang.”
Haar gunsteling musieksoorte om te sing is pop en gospel. Sy hou baie van Karlien van Jaarsveld en Taylor Swift se musiek en alhoewel sy nog nie haar eie liedjies skryf nie, is dit een van haar groot drome.
Op skool is sy ook ‘n uitblinker op die sportveld en speel hokkie vir PHS se tweedemeisiespan.
Sy geniet om haar vrye tyd saam met haar familie en vriende deur te bring, na musiek te luister, klavier te speel en is ‘n regte fliekvlooi.
“Om op te tree is vir my onbeskryflik lekker. Die lekkerste optrede wat ek sover gehad het was by die Kansa Relay for Life verlede jaar. Die moeilikste liedjie wat ek nog ooit in my lewe gesing het was Hande van Karlien van Jaarsveld en die maklikste liedjie vir my om te sing is Om Jou Pinkie van Juanita du Plessis.”
Sy oefen ongeveer vier keer ‘n week vir ten minste ‘n uur haar sang en sy vertel dat haar ma nie net haar grootste kritikus is nie, maar ook haar grootste ondersteuner.
“Eendag wil ek graag ‘n konsert vir Bobby van Jaarsveld open en ‘n reuse sukses van my musiektalent maak en dié sukses gebruik om ander mense te help,” vertel sy blinkoog.
