Bank se motorfinansieringafdeling dra by tot La Wiida se beursie
Op Dinsdag, 9 Mei is die La Wiida Leersentrum vir gestremde kinders besoek deur Kobus Bekker, Bestuurder van Absa se motorfinansieringafdeling in Polokwane.
![](https://images.caxton.co.za/wp-content/uploads/sites/68/2016/05/IMG_2208_60436.jpg)
POLOKWANE – Die doel van sy besoek was om geldelike hulp te verleen wat by Absa Krediet en Motorfinansiering Gauteng-Noord se gholfdag by Woodhill in Johannesburg ingesamel is. Hy sê die Absa motorfinansieringafdeling in Polokwane val onder die Gauteng-Noord streek.
Volgens Bekker kry motorhandelaars en kliënte die geleentheid om spanne in te skryf, bowwe te borg en skenkings by te dra.
Bekker sê dat verskeie motorhandelaars van Limpopo by hierdie geldinsamelingsgeleentheid betrokke is.
Volgens Bekker word die geld wat by hierdie jaarlikse gholfdag ingesamel word aan verskeie behoeftige instansies soos La Wiida Leersentrum geskenk. Bekker sê hy het deur sy kliëntebasis van La Wiida te hore gekom en besluit om dié leersentrum te identifiseer as ‘n begunstigde vir ‘n skenking. Die skenking se waarde is R5 000.