Hekelklub skenk komberse aan tehuis

‘n Plaaslike groep hekelentoesiaste het verlede week 35 komberse aan Martha Hofmeyr Tehuis vir Bejaardes ter voorbereiding van die komende wintermaande geskenk. Hekel Hemelklublede kom elke Vrydag by Capricorn Quilting in Platinumpark winkelsentrum bymekaar om saam aan hekelprojekte te werk.
Stigterslede, Lynette Botes en Anna-Marie Venter sê dat hulle gereeld komberse maak en aan minderbevoorregtes uitdeel. Botes en Venter het besluit om warmgoed vir die tehuis te maak omdat bejaardes hul beide na aan die hart lê.
“Danksy ure se werk kon ons binne vyf maande 20 komberse voltooi en het ook ‘n skenking van 15 komberse van ‘n weldoener ontvang,” sê Botes.
“Die ouer garde word soms vergeet en ons is baie bly dat ons iets vir hulle kon doen,” voeg Venter by. Bestuurder van die SAVF in Polokwane, Dawie Lee het sy dank namens die organisasie uitgespreek. “Die winter sluip nader en die komberse sal ons bejaardes help om warm te bly.”

Storie: LEANDRI VAN SCHALKWYK
>>leandri.observer@gmail.com

Hooffoto: Anna-Marie Venter van die Hekel Hemelklub oorhandig ‘n kombers aan Francina Makhura, inwoner van Martha Hofmeyr Tehuis vir Bejaardes.