Gaste kon hulself Vrydagaand in talentvolle plaaslike kunstenaars se skilderye verlustig met Kathryn van Schalkwyk Art Studio se openingsaand by Mall of the North en tegelykertyd van slegte nuus vergeet.
Sowat 26 studente van Kathryn van Schalkwyk Art Studio het sedert 2011 baie hard gewerk om die uitstalling met 274 skilderye in verskeie mediums moontlik te maak.
Om te verseker dat die standaard hoog is, het Van Schalkwyk elke werk van elke student op uitstalling gekeur waarna sy aanbevelings gemaak het en die skildery, met veranderinge, heroorweeg is.
Wat die uitstalling spesialer maak, is dat Kathryn se ma, Brunie Hunt, haar jongste dogter, Kylah en haar man, Hill by haar kuns-klasse neem en skilderye op uitstalling het.
“Dankie aan elke kunstenaar wat hard gewerk het om vanaand spesiaal te maak,” het Van Schalkwyk gesê en ook hul gesinne uitgesonder wat tuis moes help en die laaste tyd minder van hul geliefdes gesien het.
Die borge en die bestuur van Mall of the North wat die uitstalruimte beskikbaar gestel het, is van harte bedank.
Dit is die studio se vierde uitstalling in Polokwane. Kathryn het voorheen kunsklasse in Pretoria, Bloemfontein, Nelspruit en George aangebied en is in 2004 deur die Waterverf-vereniging van Suid-Afrika (WSSA) met die eerste Hoër Assosiaatskapstoekenning vereer.
Die uitstalling vind tot 31 Oktober in die voormalige Dion Wired-winkel langs Factorie by Mall of the North tydens die volgende tye plaas: Weeksdae van 09:00 tot 19:00, Saterdae van 09:00 tot 19:00 en Sondag van 11:30 tot 15:00 plaas.
Storie: ELNA ESTERHUYSEN
>>observer.elna@gmail.com
Hooffoto: Marié le Roux neem sedert 2006 klas by Kathryn en Eunice Knoetze (regs) die afgelope 12 jaar.