Makhado neem afskeid van hul motorfietslegende Sonet White

Sonet White (42) is verlede Woensdag in haar slaap oorlede.

Haar afsterwe was ‘n groot skok vir die gemeenskap in Makhado, waar sy baie bekend was.

Sy was die president van Wisdom Warriors Bikers Club in Makhado en ook mede-eienaar van die Rugby Lapa en Lightworld.

Volgens haar dogter, Sharlene Bird, het Sonet teen kanker gestry, maar sy wou nie gehad het mense moes daarvan weet nie.

“My ma het die stryd teen kanker verloor. Sy was ‘n wonderlike mens en het altyd gehelp waar sy kon. Sy het ‘n hart van goud gehad.

“Sy was passievol in alles wat sy gedoen het. Sy was ‘n mentor vir my en vir baie ander mense ook,” het Sharlene gesê.

Sonet het ook ‘n groot liefde vir Yorkshire Terriers gehad en sy het sewe yorkies agtergelaat waarna Sharlene nou omsien.

Sy was ook lief vir motorfietse. “My ma het saam met my pa begin motorfiets ry en sy het dit vreeslik geniet. Sy het ‘n Ducati Panegale gery en dit was vir haar ‘n passie in haar lewe.”

‘n Jarelange vriendin van Sonet, Janine Storm, het aan Review vertel dat Sonet ‘n lewenslustige mens was.

“Sy was ‘n opgewekte mens. Sy was lief vir kuier en vir al die mense om haar. Sy het graag ander mense gehelp.

“Sy het ‘n mooi hart gehad en sy was ‘n werkesel. Sonet se kinders was haar lewe en sy was verseker die mees perfekte ma waarvoor enige kind kon vra,” het sy gesê.

Sonet laat haar twee dogters, vier susters, een broer, haar lewensmaat Eric Bird en haar ma agter.

Sy is Maandag uit die Lede in Christus-kerk in Makhado begrawe.