Limpopo se ringbalspelers wys hulle slag by nasionale toernooi
Spelers het met gemengde welslae tydens die week-lange Nasionale Ringbal Toernooi in Pretoria weggestap.
POLOKWANE – Provinsiale ringbalspelers het onlangs met ‘n paar bloukolle en af nerwe by die huis opgedaag.
Hierdie merke was egter nie tevergeefs nie, aangesien hierdie spelers met gemengde welslae tydens die week-lange Nasionale Ringbal Toernooi weggestap het.
Die toernooi is in Julie in Pretoria gehou en is die laaste toernooi vir die seisoen.
Petrus Coetzee, die spanbestuurder van die gekombineerde o/11- en o/13-span, sê daar is vyf spanne uit Limpopo wat deelgeneem het.
“Van ons spelers moes in Gauteng-Noordspanne deelneem aangesien ons nie spanne het vir hulle ouderdomsgroepe nie. Ons is trots op almal.” Petrus en sy span spog met ‘n silwer medalje terwyl Lee van Kraayenburg, die spanbestuurder van die o/17-span, met ‘n goue medalje spog. Lee is gekies as die spanbestuurder vir die Suid-Afrikaanse o/20-uitnodigingsspan, terwyl die Limpopo o/17-span se onderkaptein, Dirk Lourens, in die Suid-Afrikaanse o/17-uitnodigingsspan opgeneem is.
Christine Retief, een van die spelers wat in die o/20-vroue Gauteng-Noordspan speel, sê dit was ‘n aangename toernooi. “Dit was ‘n baie lekker toernooi en ons het soos altyd mense ontmoet en vriende gemaak. Ek sien uit na ons volgende toernooi en wedstryde.”
Na ‘n paar dae se rus sal die spelers weer voorberei vir die vertoonwedstryde wat later die jaar gaan plaasvind.
