POLOKWANE – Die jaarlikse Mnr. en Mej. PHS het kort voor die skoolvakansie by Hoërskool Pietersburg plaasgevind en die finaliste het gesorg dat die gehoor lag dat die trane rol.
Review het met Gregory Carlisle en Cara van der Goot, die wenners van die kompetisie, gesels om te hoor wat vir hulle uitgestaan het en hoe dit gevoel het om te wen.
Lees meer: [VIDEOS] Pieties sorg vir groot vermaak by Mnr. en Mej. PHS
Cara se hoogtepunt was om bederf te word terwyl sy mooi kon aantrek en haar hare en grimering kon laat doen. Gregory, aan die ander kant, het dit geniet om saam met Kayla de Villiers in hulle oupa en ouma uitrustings op die verhoog te wees.
“Die oomblik toe ons agter die gordyn uitkom, het die hele saal uitgebars van die lag. Ons het ook bietjie karakter gebreek en moes hard konsentreer om nie te lag nie. Dit het my onmiddellik laat kalmeer en die res van my aand het glad verloop deur ontslae te raak van al my senuwees nog voor dit kon vatplek kry.”
Na vele vermaaklike oomblikke was dit tyd vir die wenners om aangekondig te word. Cara sê dit was ‘n reuse verrassing en ‘n maagdraai-oomblik wat sy nooit sal vergeet nie. Gregory het ‘n vreemde golf van blydskap en kalmte ervaar.
“Dit was baie lekker gewees om as Mnr. PHS gekroon te word, maar ek gaan wel die sê: Daar was sterk kompetisie vir beide Mnr. en Mej. PHS vanjaar en ek weet dat dit nie maklik was om ‘n wenner te kies nie. Elkeen wat deelgeneem het kan geëerd voel om deel te kon wees van die kompetisie.”
Cara en Gregory kan egter nie nou agteroor sit en ontspan nie. Hulle moet PHS verteenwoordig en as goeie ambassadeurs optree. Dan is daar ook ‘n moontlike gemeeenskapsprojek en fondsinsameling wat nog voorlê.
“Ek is nog nie seker oor al die projekte nie, maar ek glo ons sal ook moet mooi lyk by al PHS se groot plegtighede,” sê Gregory.
Lees meer van die twee in volgende week se Polokwane Review.
