Ensemble Esprit beoog Messiasprojek in Augustus

Polokwane se eie kamerkoor, Ensemble Esprit beplan ‘n Messias-projek vir 3 Augustus wat beloof om ‘n hoogtepunt op die stad se kultuur­kalender te wees.
Woordvoerder van Ensemble Esprit, Ans Becker sê dat ‘Messias’ van G.F. Handel een van die mees ikoniese klassieke koorwerke van alle tye is en dat musiekliefhebbers in Polokwane vanjaar die geleentheid gaan hê om uittreksels uit hierdie meesterwerk op eie bodem te beleef.
Die bekende en vermaarde dirigent van die UJ Universiteitskoor, Renette Bouwer, sal die dirigeerstok hanteer en ook twee sopraansolo’s lewer. Die samewerking van nog twee kore, Cantamus Corde van Pretoria, onder leiding van Surette Prinsloo en Molen Kòrus van Potchefstroom, is verkry. Molen Kòrus, onder leiding van Loretté du Toit en Kobus Venter, is verlede jaar as wenners by die oop afdeling vir gemengde kamerkore by die Wêreld Koorspele in Pretoria aangewys.
Renchia Grobbelaar sal die orrelbegeleiding behartig. Becker sê dat Ensemble Esprit nog vakatures vir veral soprane en tenore het wat dringend gevul moet word. Ander stempartye is ook welkom. “Belangstellendes met koorerva­ring word genooi om te kom saamsing – dié geleentheid gaan nie gou weer kom nie,” sê Becker. Sy kan by 082 457 8171 of ansbecker@gmail.com bereik word en oudisies vind reeds plaas.

Storie: BARRY VILJOEN
>>barryv.observer@gmail.com