Graad 12’s seëvier wéér tydens Kardoesie
Daar word groot fees gevier deur die graad 12-leerders en hul graadvoogde van Hoërskool Pietersburg (PHS) wat Dinsdagaand as Kardoesiewenners aangewys is. Die begeesterde groep leerders was ook wenners in hul graad 8 en -9 jaar en boonop is dit vanjaar die 50ste jaar wat Kardoesie in PHS se besit is. Die matriekgroep se tema …
Daar word groot fees gevier deur die graad 12-leerders en hul graadvoogde van Hoërskool Pietersburg (PHS) wat Dinsdagaand as Kardoesiewenners aangewys is.
Die begeesterde groep leerders was ook wenners in hul graad 8 en -9 jaar en boonop is dit vanjaar die 50ste jaar wat Kardoesie in PHS se besit is.
Die matriekgroep se tema “18 till I die” het groot aanklank by beoordelaars gevind en hulle is nie net as algehele wenners aangewys nie, maar ook bekroon as die groep met die oorspronklikste tema, beste kreet, beste dissipline en beste gees. Die graad 11-groep se dirigente is as beste vir die aand aangewys.
Kardoesie, ‘n pop wat al 50 jaar deel van PHS se tradisie is, is Dinsdagmiddag ook in die vorm van ‘n lewensgrootte gelukbringer aan die skool bekendgestel. Die skool was ook bevoorreg om Kardoesie se skenker, Heyla Genis en die hoofseun van 1968, Piet Swanepoel in hul midde te hê om saam fees te vier.
Kardoesie word jaarliks deur die graad 12-leerders ontvoer en is Dinsdagmiddag net ‘n halfuur gegun om saam met leerders haar verjaardag te vier.
Dinsdagaand het oudergewoonte vir groot opwinding gesorg met graadgroepe wat op die pawiljoen om Kardoesie as trofee meegeding het. Eenvormige bewegings, lewendige musiek en vlugtige danspassies het elke graadgroep gekenmerk. Die graad 10-groep was eerste aan die beurt met “Lights, cameras, action” toe die graad 8-groep met “Dancing through the decades” en die graad 9-leerders met “Prison Break.” Die voorlaaste vertoning is deur die graad 11-groep met “Extremely sporty” behartig waarna die graad 12-leerders die aand op ‘n hoogtepunt afgesluit het.
Storie: RC Myburgh
>>rc.observer@gmail.com
