Die belangrikheid van lees: Begin vroeg
In 2018 is daar bevind dat ongeveer agt uit 10 gr. 4-leerders in Suid-Afrika, nie behoorlik kan lees nie. Meer onlangs is daar ook bekend gemaak dat kinders nie met begrip kan lees nie.
POLOKWANE – Riana Claassen, van Star Child Development Center, beklemtoon die belangrikheid van lees.
“Om enige iets in die lewe te doen moet ‘n mens kan lees, dit sluit wiskunde in. Wanneer ‘n kind nie goed en met begrip kan lees nie, gaan hy sukkel om leervakke baas te raak. Swak lees tas ook ‘n kind se selfvertroue aan.”
Sy vertel ‘n mens kan terloopse lees reeds vanaf vier-jaar met ‘n kind toepas. “Wanneer jy ‘n woord of naam sien, maak hom bewus daarvan en sê die woord. Soos byvoorbeeld ‘Absa’, ‘Stop’ en so aan. Speel ook speletjies soos Ek Sien Met My Kleine Ogie, om hulle van die klanke bewus te maak.”
Volgens Riana is daar voordele daaraan om reeds van kleins af voor te lees vir jou kinders.
“Dit bou hulle woordeskat en wiskunde vaardighede. Vorms word ook deur lees aangeleer.”
Riana behartig skoolgereedheid toetse en help leerders in die juniorfase om hulle leesvaardighede op te skerp.
Lees meer van haar in Review.
