Eugene, held sonder ‘n mantel
Eugene Schreiber vertel hulle was vir 24 uur nadat die sikloon Mosambiek getref het op bystand, maar die kommunikasie vanaf Mosambiek was baie beperk en hulle het baie daarmee gesukkel.
POLOKWANE – Sikloon Idai het in Maart vir Mosambiek, Malawië, Zimbabwe en Madagaskar in skerwe gehad. Dit was een van die ergste siklone in Afrika en die Suidelike-halfrond. Duisendes gestrand en sonder hoop. Hulp vanaf die buiteland het ingestroom, deel hiervan was bystand van Gift of the Givers.
Lees ook: Cyclone-hit Mozambique fears cholera epidemic
Eugene Schreiber, bekende inwoner van Polokwane, wat tans in Mokopane woon, is reeds vanaf 2010 af deel van dié hulpgroep. Hy vertel hoe hy deel geword het van Gift of the Givers.
“In 2007 was die Soek- en reddingskoördineerder in een van my opleidingsklasse. In 2010 het ek ‘n voorlegging aangebied vir hulle in Bramley, en toe so deel geword van Gift of the Givers.”
Hy vertel hulle was vir 24 uur nadat die sikloon Mosambiek getref het op bystand, maar die kommunikasie vanaf Mosambiek was baie beperk en hulle het baie daarmee gesukkel. Vanaf 17 Maart, was hulle op bystand vir Zimbabwe.
“Die Soek- en reddingspan het op Maandag, 18 Maart, bymekaar gekom in Bramley. Hier het ons al die nodige toerusting gepak, sodat ons die middag na Zimbabwe kon vlieg. Ongelukkig kon ons toe eers Dinsdagoggend om 09:30 vlieg.”
Die plan was om na die vermiste persone te gaan soek.
Aangesien daar geen vervoer vanaf Zimbabwe was nie, het die span terug gekeer na Suid-Afrika en op 30 Maart was Eugene weer by sy gesin.
“Die nederigheid van die Zimbabweërs was baie opvallend. Hulle het geen hoop gehad nie, want niemand wou Zimbabwe toe gaan nie. Daar is nog baie mense vermis wat deur die vloede en modder weggespoel is. Dit gaan baie sleg daai kant. Ek dink die slegste is die skool met 39 kinders en een onderwyser wat nog vermis is. Daardie hoop op die mense se gesigte, dat daar ‘n Suid-Afrikaanse Soek- en reddingspan is wat kom help het, was hardroerend. Die ‘baie dankies’ wat deur die gemeenskap gesê was.”
Eugene sluit af deur te vertel dat hulle altyd gereed is om bystand te lewer waar hulle kan.
