Smaaklikste lamsvleis kom van die Vrystaat

Skaapvleis was op almal se lippe op meer as een manier tydens 'n kompetisie om die smaaklikste lamsvleis in die land te vind.

2 hours ago

Elize Parker 1 minute read

Hendrik Mabunda het deelnemers van Pretoria-oos, Charl (middel) en Alwyn Kleynhans gehelp om die skaap op die spit gebraai te kry vir die beoordelaars om te proe.

Jason Davel van Donkerberg in die Vrystaat se lamsvleis van sy Ile de France-skaapkudde is aangewys as die beste lamsvleis by die Lamb Champs-kompetisie wat deur die familieboernetwerk Saai op 20 Julie by die Pretoria Botaniese Tuin aangebied is.

Davel het weggestap met die eerste prys van R80 000.

Gawie van Heerden van Noord-Kaap het die tweede plek behaal met sy Merino-lamsvleis en in die derde plek was Colene van der Merwe van Noord-Kaap met haar dormer-skaapvleis.

Dit is die derde jaar wat die kompetisie in Pretoria aangebied is. Die deelnemende boere se uitdagings en suksesse sal ook eersdaags in ’n TV-program gesien kan word.

Meer as 8 000 mense het die vleisfees bygewoon en reeds vroeg was die sappige reuk van die skape op die spitte in die lug en het monde gewater.

Twee van die beoordelaars van die Lamb Champs-skaapvleiskompetisie: Frans Cloete en Pieter Labuschagne van Pretoria-ooos

Skaapboer Hein Smit van Pretoria-oos was een van die deelnemers aan die Lamb Champs-skaapvleiskompetisie van Saai.

Die beoordeelaars was vroeg aan die proe en die publiek kon vanaf 12:30 ook vir hulself proe en weglê terwyl die musiek van kunstenaars van die sanggroep Jan Jan Jan en gewilde sanger Eloff hul vermaak het.

Sjarmante gasvrou en bekende TV-aanbieder, Minki van der Westhuizen, het die skare vermaak en talle pryse uitgedeel.

Die hoogtepunt van die dag vir vele was die skaapkop-eet-kompetisie toe sowat 50 deelnemers elk ’n skaapkop blink moes eet en ’n 500ml bier klaar drink onder 15 minute. Die kompetisie is gewen deur JP du Preez van De Aar.

“Die kuns lê daarin om gereeld die bier nader te trek terwyl jy die vleis afsny met ’n goeie, skerp knipmes,” vertel Du Preez.

Bekende bantam-gewig UFC-vegter, Cameron Saaiman, is as aanbieder van die Moer ’n Boer TV-reeks van die boere wat teen gevestigde vegters op die reeks vanaf 25 Julie te siene gaan wees op die VIA-kanaal, aan die gehoor voorgestel. Twaalf rateltaai plaasboere is vroeër vanjaar gekies en is in die MMA-gevegskuns opgelei.

Pretoria word deur Zac Steyn, ’n Angus-beesboer, verteenwoordig in die gevegskompetisie.