Leeuwelpies, verjaarsdaggorilla en nuuskierige kamele sterre van kerspartytjie
Kersvieringe by die Pretoria-dieretuin het spesiale bederfkos vir die eenjarige leeuwelpies, drinkbare jogurt vir die verjaarsdag van die gorilla en 'n verrassig tussen die takke en blare vir die nuuskierige kamele ingesluit.
Drie vroulike leeuwelpies wat op die ouderdom van twee weke gered is van swartmark leeusmouse, was vanjaar die sterre van die Pretoria-dieretuin se kerspartytjie.
Die drie eenjarige wyfies – Zena, Sora en Venus – is deur die polisie gekonfiskeer toe leeusmouse hulle wou verkoop.
Die kurator van die Pretoria-dieretuin se roofdierafdeling, Carol Thobela-Mabaso, sê twee van die wyfies kom vanaf een ouerpaar terwyl die ander een van ‘n ander trop kom.
Die Gautengse Departement van Landbou en Landelike ontwikkeling het die drie diere aan die dieretuin na die beslaglegging toevertrou.
Die hofsaak rondom die misdaad is nog hangende.
Sluikhandel in leeuwelpies is deel van die leeus-in-aanhoudingbedryf in Suid-Afrika wat die minister van Bosbou, Visserye en die Omgewing, Barbara Creecy, ‘n einde aan wil maak deur nuwe wetgewing oor die bestuur van ikoniese spesies in te stel.
Met swartmark leeuhandel word welpies van een week tot vier maande deur leeusmouse van hul ma’s weggeneem sodat die wyfies weer vinnig in oestrus kan kom.
Ondertussen het die drie naam vir hulself gemaak met hul nuuskierige en spelerige persoonlikhede in hul kampie langs die kampe van die twee wolwe, jakkals en die cheetah.
Hierdie area van die dieretuin is nou die gewildste kuierplek vir besoekers.
Thobela-Mabaso sê die versorging van die jong welpies verg toewyding.
“Ons moes baie oortyd werk want hulle moes elke twee uur eers aangemaakte babamelk kry en toe later koeimelk. Bietjie later kon hulle met hoender ‘n vaste dieet begin. Hulle is nou nogals lief vir ‘n stukie beesvleis ook,” vertel sy terwyl sy liefdevol na die drie onnutte kyk.
Nataniel Ntshweni het vir die drie hul kersmaal vir die dag, elk ‘n hoender, gegee waarna hulle besoekers met hul weergawe van die leeu-wêreldsokkerbeker vermaak het.
Die kerspartytjie het ook as 22ste-verjaarsdagpartytjie gedien vir een van die twee gorillas in die Pretoria-dieretuin.
Binga verjaar
Die gorillamannetjie, Binga, het in 2010 by die dieretuin gearriveer en word beskryf as “gereserveerd en skaam” deur die bewaringsbeampte, Mankwe Rababalela.
Vir sy verjaarsdag en verrykingsaktiwiteite is verskeie verjaarsdagkardoese met sy gunsteling snoepgoed in die kampie versteek.
Hy is deur sy kampiemaat, Bonsenga vergesel op hul soektog na die kardoese vol vrugte en Binga se spesiale verjaarsdagbederfie: Drinkjogurt!
“Hy is baie kalm en gereserveerd, maar kan nogals uitbundig raak wanneer hy sy jogurt en veral blaarslaai sien,” vertel Rababalela.
Ook gereed vir hul bederfie was die drie wilde honde in hul ruim kamp.
Hulle prooi is in ‘n boom opgehang, maar het skaars 30 sekondes gehang voordat hulle korte mette daarvan gemaak het.
Vir die drie Drommedaris-kamele is ‘n spieël versier met kersversierings tussen hul dagvoeding van blare en takke versteek.
Die drie het na hul speletjies om die takke te verwyder, verbaas na hul eie weerkaatsings vir ‘n oomblik of wat gestaar en toe fluks aan die snoepgoed begin weglê.
Een van die bewaringsbeamptes wat met die kamele en alpacas werk, Kenneth Baloyi, sê kamele is nuuskierig.
“Ons wou hul reaksie toets op hierdie verrykingsaktwiteit wat wêreldwyd met diere gebruik word,” verduidelik Baloyi.
LEES OOK: Petrolswendelaar se dae dalk getel na motoriste ‘n speletjie van haar verskynings maak
Het jy dalk meer inligting rakende dié storie? Stuur gerus vir ons ‘n epos na editorial@rekord.co.za of skakel ons by 083-625-4114.
Vir jou daaglikse gratis gemeenskapsnuus, besoek Rekord se webwerf: Rekord
Besoek ook ons Facebook, Twitter en Instagram blaaie.
