Teine eerstes looi Alberton: Maak dit 4 uit 4 in Pirates-liga
Teine se eerste span beklink hul vierde agtereenvolgende oorwinning in die Pirates Groot Uitdaagreeks.
![](https://images.caxton.co.za/wp-content/uploads/sites/3/2024/05/440085525_966609215_54144-e1716382432186-780x470.jpg)
Teenstanders sal beslis regop sit en kennis neem van Randfontein Rugbyklub se eerste span na nog ‘n skouspelagtige oorwinning in vanjaar se Pirates Groot Uitdaagreeks.
Op 17 Mei het Teine se eerste span hul vierde agtereenvolgende oorwinning beklink, dié keer oor Alberton met ‘n telling van 39–7.
Teine het sewe drieë in totaal gedruk met Herman van Eck, Louis Smit, Rudi Marx, Wynandre Human en Dewalt Sonnekus wat almal bygedra het met een drie. Franco Tiedt het twee keer agter die opponent se doellyn gaan kuier. Verder het Janco Tiedt met twee doelskoppe geslaag.
![](https://images.caxton.co.za/wp-content/uploads/sites/3/2024/05/438737551_957674386_29837-e1716382420215-520x346.jpg)
Verder was die derde en tweede spanne ook aan die wenkant met seges van 38–8 en 28–0 onderskeidelik.
Die vrouespan het ook beïndruk met hul wegholoorwinning van 28–0 oor die Soweto Eagles.
Ongelukkig het Teine se o19’s en o21’s die knie gebuig met loesings van 29–13 en 32–7 onderskeidelik.
Die Randfontein-gemeenskap word genooi om eerskomende Saterdag, 25 Mei, na die groot Wes-Randse derby tussen Roodepoort en Teine by die House of Pain in Randfontein te kyk.