‘n Boogskutter op 79
Jan Taljaard het eers vroeër vanjaar saam met sy kleinseun begin met boogskiet.
Ouderdom moet nooit in jou pad staan wanneer jy ‘n nuwe stokperdjie wil leer nie – vra maar vir Jan Taljaard.
Die 79-jarige inwoner van Greenhills het eers vroeër vanjaar begin met boogskiet en geniet elke minuut daarvan. Hy is ‘n lid van Klub Inyathi.
Hy het vertel dat hy onlangs saam met sy kleinseun, die 12-jarige Ryno Taljaard die sport begin beoefen het. “Ek het besluit dat my kleinseun dit nie alleen kan geniet nie, daarom wou ek dit saam met hom aanpak.”
Volgens Jan geniet hy boogskiet oor die samesyn met die kinders en ander volwassenes, en boogskietkompetisies is vir hom baie lekker.
Dit is ‘n baie goeie sport om mens fiks te hou want dit is baie goeie oefening.”
Hy het reeds aan twee kompetisies deelgeneem. Tydens sy eerste kompetisie het hul span gewen, en tydens die tweede kompetisie is hy as spanbestuurder aangewys.
Tans oefen Jan vier keer ‘n week saam met Ryno.
“Wanneer ek begin sukkel om die boog te trek dan stel ek hom net af.”
Jan moedig almal aan om te begin boogskiet omdat dit so ‘n lekker sport is en omdat mense van alle ouderdomme daaraan kan deelneem.
