Altesaam 12 boksklubs van so ver as Springs en Centurion het Saterdag aan ‘n bokstoernooi in Azaadville deelgeneem.
Die Krugersdorp-Wes Amateur Boksklub (Kwab) het dié bokstoernooi aangebied en sê dat dit hulle laaste toernooi vir die jaar is.
Met 40 boksers wat in die loop van die dag in die kryt was, moes toeskouers, skeidsregters en beoordelaars omtrent kophou.
Daar was vyf verskillende bokskategorieë waarin die boksers kon meeding.
Susan da Silva van Kwab sê dit was ‘n lekker manier om die boksseisoen af te sluit.
“Dit was regtig ‘n baie suksesvolle dag en almal het dit geniet.”
Sy bedank ook die borg van die dag, Mogale City Plaaslike Munisipaliteit, wat so ‘n sportgeleentheid moontlik gemaak het.
“Hulle het ons baie tegemoetgekom en ons selfs gehelp om ‘n lokaal te kry wat groot genoeg was. Ons bedank hulle en almal wat tot die dag se sukses bygedra het.”
Sy sê sy sien reeds uit na volgende jaar se suksesse.
Van die Wes-Randse boksklubs wat deelgeneem het sluit in Randgate en Sparks van Randfontein, Witpoortjie in Roodepoort en Avanté in Tarlton.
