Vanjaar se Vleisfees by die Tuinhekkie op 3 Augustus, die vierde van sy soort, was uiters pret vir besoekers wat dit selfs as ‘n goeie plaasvervanger vir die bekende skou beskryf het.
Volgens Sionspoort Vleisfees mediabestuurder Appel Ernst, was daar ongeveer 300 stalletjies waarvan besoekers kon kies en keur.
“Ons as gemeente was verstom oor die verskeidenheid ouderdomsgroepe wat die hekke binnegestorm het om die dag saam met vriende en familie te geniet,” het Appel uitgedruk.
• Lees ook: Die 2024 Vleisfees IN FOTO’S
Appel het verder verduidelik die doel van die Vleisfees was om vir nie-winsgewende organisasies ‘n platform te skep en sodoende bewusmaking van hul werksaamhede te bevorder. Die daaropvolgende doel was om die gemeenskap saam te bring en vir hul vermaak aan te bied.
Sy het beklemtoon dat die Vleisfees nie bestaansreg sou hê sonder borge nie.
Die fees het hierdie jaar die D2 DRUMMIE-kampioenskappe se eindrondte aangebied waar ongeveer 250 leerders van verskeie skole vanuit die Wes-Rand hul dansvernuf ten toon gestel het. Appel het bygevoeg dat 13 kategoriewenners aangewys was.
Twee-en-vyftig veteraanmotors was hierdie jaar mee gespog en volgens Appel was dié afdeling geborg deur Greenhills Sasol. Die wenners in die veteraanmotoruitstalling word elders vermeld.
Die fees het natuurlik opreg gespog met die plaasafdeling waar daar vee op skou was, onder andere Kalahari Reds en boerbokke.
Die jongklomp kon dan baljaar met groot kindervermaak soos glybane en ‘n bungee-trampolien. ‘n Groot bydrae tot hierdie vermaak was die kameelritte.
En wat sal ‘n Vleisfees wees sonder vleis? Appel vertel dat die Sionspoort Gemeente gesorg het vir skilpadjies, kaiings, worsbrode, skaap en krokodil op die spit. Sy het bygevoeg dat ander instansies vir groter verskeidenheid kosse gesorg het.
“Die teenwoordigers was baie honger. Oral het rye gestaan opsoek na lekkerte om aan te smul. Vleisfees wors en hamburgerpatties is aangebied by die vars vleisstalletjie,” het Appel verduidelik.
‘n Nuwe vertoning het hierdie jaar die program gemaak, naamlik die stoeiers van die National Wrestling Federation. Appel het opgemerk die stoeiers het hul gewigte in die kryt rondgegooi en die toeskouers het luidrugtig aan die pret deelgeneem.
Verder het die RE/MAX ballon hierdie jaar die aanduitsig oor die omgewing moontlik gemaak.
Verskeie kunstenaars se stemme het die fees ook laat brul. Kunstenaars soos Monique, Zander, Taye, Landman, Tamlyn, Renaldo, Marko le Roux, Jayde Mitchell, Hennie du Bruyn asook Die Kitaarkêrels. Tanya V en Anton Fitchat het deurgaans opgetree as seremoniemeesters in die twee arenas oor die twee dae.
Kunstenaars Juan Boucher en die immergewilde Rikus Nel het by die fees aangesluit vir die aand se vermaak en as daar ‘n dak was, was dit ook weggesing.
Appel het beklemtoon dat die terugvoering van die Vleisfees oorweldigend positief was.
“Ons kyk met groot dankbaarheid terug na ‘n fantastiese fees! Baie dankie aan die reëlingskomitee en die gemeente vir die puik organisasie. Dankie ook aan elke borg, uitstaller, werker, ons skole, ander gemeentes, plaaslike instansies en ons sakegemeenskap vir jul hulp en betrokkenheid. Dankie aan die Randfontein-gemeenskap en ander besoekers van heinde en ver, se ondersteuning. Bo alles dank, lof en eer aan ons Hemelse Vader vir die seën en goeie guns uit Sy Hand,” het Appel afgesluit.
Besoeker Yolanda Beukes het vertel dat dit haar en haar familie se eerste keer by die Vleisfees was. Sy het opgemerk die kos was uitstekend en haar seun was mal oor die veteraanmotors en sê dit was sy hoogtepunt.
“Die Vleisfees is elke jaar lekker. Dit is ‘n goeie plaasvervanger vir die skou,” het Jaco en Helena Olivier gesê.
“Dit is baie lekker! Ek hou van die krokodil op die spit. Dit proe soos vis en hoender,” het Leyghton Mucerry vertel.
“Ons werk op ‘n plaas en daarom geniet ons dit om na die plaasprodukte by die fees te kyk,” het Kyle Nel en Antonio Galvan uitgedruk.
Sarel van der Walt en sy familie het die fees geniet en vertel die kos en brandewyn het goed afgegaan.
