Boere drom saam by gewilde NWK boeremark
Die NWK Randfontein bied nog 'n suksesvolle boeremark aan.
NWK Randfontein het die afgelope naweek ‘n suksesvolle boeremark aangebied.
Nadat die besigheid onlangs in Loumarina AH gehuisves is, is daar ‘n reeks boeremarkte wat aangebied is.
Die eerste stal was tuis gegroeide groente wat gekomplimenteer was met tuisgemaakte konfyt. Die eienaar van die stal, Cobus van der Watt, het beklemtoon dat alle vars groente uit sy eie tuin gepluk is. Die stal is ‘n geleentheid om ‘n inkomste te verdien aangesien Cobus ‘n pensionaris is. Hy beskryf sy stal as ‘lokale mense wat bestaan’. Dit is nie ongewoond vir Cobus en sy familie om van die groente te skenk aan minderbevoorregtes nie. Volgens Cobus is die stal nie net finansieel motiverend nie, maar dit bied ‘n geleentheid om ‘n verandering te maak in minderbevoorregte gemeenskappe.
Die volgende stal het bestaan uit drie besighede naamlik AD KEY, Bell Apparel en @Printfection wat hoofsaaklik handelsmerke en bemarking beoefen deur middel van drukwerk en grafiese ontwerpe. Natasha van Wyk en Grant Bell se produkte het bestaan uit sublimasie en klere waar hulle gespog het met unieke grafiese ontwerpe en persoonlike handelsmerke. Natasha vertel dat hul grootste kliënte Lenmed Privaat Hospitaal, Checkers en die ANC is.
Die Braai 3-stal het ‘n groot bydra gemaak tot die woord ‘boer’ in die mark. HP Lensley het vertel dat die Braai 3-stal uitnemende braaiers en voerbakke verkoop het. HP het verduidelik dat die voerbakke vir die boere is wat hul skape en beeste wil voer en die braaiers vir die boere is wat ‘n lekker Sondagaand wou geniet.
Jeremy Smith het die afgelope naweek Rosetta Nursery verteenwoordig deur groot verskeidenheid blomme en plante uit te stal.
“Dit is ‘n verskriklike belangrike idee om ‘n markdag aan te bied omdat dit werklose individue die geleentheid bied om ‘n regte uitlaatklep te hê,” het Jeremy gesê.
Marientjie’s was nog ‘n stal wat met hul besigheidstalent gespog het. Marina Wasserman het op die dag haar borduurwerk uitgestal en daar was ‘n verskeidenheid items te kope gewees wat wissel van lappoppe tot voorskote.
Cast Aways Animal Sanctuary het ook die geleentheid aangegryp om ‘n fonsinsameling te hou. Daar was drie babahonde wat aangeneem kon word. Louisa Rossouw, stigter en direkteur het vertel dat die babahonde se ma ‘n Skaaphond is en hul pa ‘n Shar Pei. Bo en behalwe dat Louisa die babawoefies verkoop het, het sy ook ‘n vergiftigingskissie verkoop. Hierdie kissie word gebruik om te verhoed dat jou troeteldier sterf aan ‘n gifmiddel soos rotgif en Two-Step.
