RAM-skaakspelers presteer op provinsiale vlak
RAM is trots op een van hul skaakspelers wat as die skool se beste skaakspeler van die dag aangewys is tydens die Gauteng Skaakkampioenskappe.
Laerskool Randfontein se o11 en o13 seuns skaakspanne het onlangs aan die Gauteng Skaakkampioenskappe by die Walter Sisulu-saal in Randburg deelgeneem en almal ‘n ding of twee gewys.
Volgens skoolwoordvoerder Annie Nolan is dit ‘n ongelooflike groot voorreg om deel te neem op provinsiale vlak en die skool daar te verteenwoordig.
“Teenstaanders soos Crawford College en Laerskool Helderkruin haal die beste uit elke speler. RAM se beste skaakspeler van die dag was Tshire Kalimashe. Tshire is ‘n o11 speler, maar het vanjaar bord een vir die o13 span gespeel. Hy wen al sy rondtes by Gauteng en dit is voorwaar ‘n prestasie om op trots te wees. Tshire is ook vroeër vanjaar aangewys as die D2 wenner vir o11 seuns.”
Nolan het bygevoeg Laerskool Randfontein is dankbaar vir ‘n wonderlike jaar op die swart en wit oorlogsveld.
“Die mikpunt is om volgende jaar met al vier spanne aan die Gauteng Kampioenskappe deel te neem. Groot drome, maar nie onmoontlik nie, want by Laerskool Randfontein kry ons drome vlerke!”