Drie gate wat nooit herstel is nie, het basies in ‘n modderdam in die pad voor die Engelbrecht-gesin se huis in Tierstraat ontwikkel.
Op die Herald se voorblad van die 17 Junie-uitgawe was daar ‘n foto van Sylvester Engelbrecht wat by ‘n groterige gat in die pad gestaan het, maar daardie gat is nou nog groter.
Lientjie Engelbrecht het verduidelik dat die munisipaliteit oorspronklik die gat gegrawe het, maar dat dit al hoe groter en vol water geraak het.
Ek het met die raadslid gepraat en daar is gereël dat die water weekliks uitgepomp sou word want dit bou op en dit druk in ons erf in. Ons huisfondasie is besig om te sak.”
Hul muur het gekraak, die trampolienput bly vol vrot water wat nog steeds uitgepomp moet word, en die grasperk bly permanent nat.
“My groot bekommernis is dat skoolkinders elke dag hier verbyloop en as iemand hier inval is hulle dood. Jy gaan dit nie eers weet nie want die water is so vuil. Jy kan niks sien nie en ek is ook bang vir my eie tweejarige se veiligheid.”
Dit is nie net ‘n veiligheidsrisiko nie, maar ook ‘n gesondheidsrisiko. Hul honde drink die aaklige water.
Wie gaan vir ons skade betaal? Nie ek nie want dit is nie my skuld nie. As die gemors ses maande terug reggemaak is, was dit nie nou ‘n probleem nie. Jy kan nie behoorlik by jou erf in- en uitkom nie want daar is ‘n helse gat in die pad!”
