Mense maak hul harte oop sodat Willem weer kan hoor
Child & Family Welfare, Randfontein ('n projek van die Bethany House Trust in Krugersdorp) het vir Willem 'n stel gehoorstukke geskenk.
Talle gemeenskapslede het hul harte oopgemaak sodat Willem Faber se wens kon waar word om weer te kan hoor.
Die Herald het op Donderdag, 3 Maart berig oor Willem, 78, wat om hulp vra om te kan hoor aangesien hy en sy vrou wat albei pensioenarisse is en nie vir hom gehoorstukke kan bekostig nie.
Die gemeenskap het ook nie op hulle laat wag nie.
Lees die oorspronklike storie hier: Help asseblief vir Willem, 78, om weer te kan hoor
Child & Family Welfare, Randfontein (‘n projek van die Bethany House Trust in Krugersdorp) het vir Willem ‘n stel gehoorstukke geskenk, maar dit was nie al nie. Robinson HearCare by Life Robinson private hospitaal het aangebied om sy gehoortoetse gratis te doen en boonop die gehoorstukke vir hom in te stel.
Toe die Herald die gehoorstukke op Vrydag, 4 Maart by Willem gaan aflaai het was hy geskok en het in trane uitgebars van blydskap.
Al wat hy met die grootste glimlag kon sê was baie, baie, baie dankie aan almal wat gehelp het en dat hy alles baie waardeer.
Willem kan nou weer voluit leef aangesien hy kan hoor en kommunikeer.
