Dit was weer tyd vir die jaarlikse groentjiekonsert by Hoërskool Riebeeckrand en die Graad 8-leerders het alles uitgehaal om hul beste voetjie voor te sit.
Vanjaar se tema was The Royal Bachelorette, en daar was kleurvolle kostuums, gekleurde beligting en groot entoesiasme.
Hoofdogter Kaela Smuts het die storie vertel van ‘n prinses wat soos die gewilde TV-reeks karakter Nanny McPhee was – lelik aan die begin maar soos wat sy verlief raak, het sy mooier geword. Haar ouers was baie bekommered want sy wou nie trou nie en toe reël hulle met ‘n koninklike adviseur vir haar ‘n vrygesel (bachelor). Daar was nege waaruit sy kon kies, onder andere Riebeeck van Rand, en dit is wie sy uiteindelik gekies het.
Skoolwoordvoerder Elzeri Wright het vertel dat hoofdogter Kaela Smuts en onderhoofdogter Karla Henning die teks geskryf het. Hulle het ook die hoofkarakters afgerig, en die dansgroepe is deur die seniorraadslede afgerig.
Hierdie jaar se groentjiekonsert was een vir die boeke. Die Graad 8-leerders het hulself deeglik geniet en hul gehoor behoorlik vermaak.
