Kan jy nog onthou hoe dit gevoel het om as sorgvrye kind op ‘n sonnige dag op die skoolveld in die water rond te baljaar?
Talle leerders van Laerskool Rapportryer het met hul kaalvoete en rooi wangetjies op Rappies se sportveld rondgehardloop tydens ‘n lieflike Waterdag op Donderdag, 11 November.
Daar was talle waterglybane en die leerders het in lang rye gestaan en wag vir hul beurt om in die water te baljaar.
Nie net die waterglybane het die leerders besig gehou nie. Daar was ook ‘n dompeltenk waarin leerders mekaar kon laat val deur die knop te druk, en die skuimput wat hulle van kop tot toon in skuimmonsters verander het.
Die leerders het gedink net hulle gaan al die pret hê, totdat die onderwysers hulle gewys het hoe dit gedoen word. Die leerders het uit hul mae gelag vir die onnies in hul pap sop nat hemde en broeke nadat hulle by die glybane afgegly het om af te koel.
Elna van Aswegen, organiseerder van die pretdag het vertel dat hulle die waterspeledag aangebied het om dankie te sê vir die leerders wat so hard gewerk het vir die fondsinsameling, en vir die geld wat hulle ingesamel het.
Vir die fondsinsameling moes die kinders ‘n aantal woorde kon lees en is dan daarvolgens geborg. Hulle kon dan ‘n sekere aantal ure speel. Almal neem daaraan deel,” het Elna vertel.
