Laerskool Rapportryer het onlangs die RandWes Dierebeskermingsvereniging (DBV) verras met ‘n groot donasie.
Op Dinsdag, 28 September het die skool ‘n sleepwa vol honde- en katkos aan die DBV oorhandig.
Organiseerder van die projek, Sonja Brits het gesê dat hulle ‘n groot gemeenskapsprojek geloods het weens die dringende behoefte aan kos by die plaaslike DBV.
Skoolhoof Andrè Kruger het vertel dat die projek die skool, ouers en leerders baie na aan die hart lê.
“Ons besef dat veral nou, in die Covid-19-tyd, die finasiële druk op gesinne so toegeneem het dat vele gesinne nie meer vir hul geliefde dierekinders kan sorg nie, en het geen ander keuse nie as om by die DBV vir hulp aan te klop,” het hy verduidelik.
Hulle as ‘n skool wou graag met die DBV hande vat om hul taak te vergemaklik.
“Ek wil elke ouer van Rapportryer opreg bedank vir hul bydrae tot die projek. As dit nie vir julle as ouers was nie, was hierdie projek nie so ‘n groot sukses nie.”