‘Ek soek ‘n huis’ – Sputnik
'n Pragtige kat soek 'n huis waar sy haar wonderlike persoonlikheid kan uitleef.
Katte is liefdevolle en saggeaarde troeteldiere. Daar is boonop baie van hulle by Cast Aways Animal Sanctuary in Wilbotsdal wat huise kort.
Een van daardie oulike katte se naam is Sputnik.
Sy het ‘n wollerige swart pels en ‘n wit pens, ‘n bruinerige vlek op haar neus, en die mooiste groen oë.
Sputnik is in Februarie 2019 by die skuiling gebore en is dus ongeveer ‘n jaar en ‘n half oud. Haar ses boeties en sussies het al klaar hulle eie huise gekry.
Volgens Louisa Rossouw, die eienaar en stigter van die skuiling, is al haar inentings op datum en is sy ook gesteriliseer.
Sputnik het ‘n baie sosiale en wonderlike persoonlikheid; sy is baie lief vir drukkies en soene,” het Louisa vertel. Sy sal goed oor die weg kom met kinders asook ander katte.
“As mense wat honde het haar aanneem, en die honde aanvaar katte, sal sy vinnig inpas.”
Enigiemand wat vir Sputnik ‘n liefdevolle huis wil gee waar sy haar wonderlike persoonlikheid kan uitleef, kan gerus vir Louisa Rossouw kontak by 072 812 3333.
