Dogter wens haar ma ‘n gelukkige verjaarsdag deur die media toe
'Die koronavirus hou ons weg van haar af'
Die inperkingstyd het selfs ‘n impak op wanneer jy jou geliefdes mag sien, en boonop op die manier waarop ons hulle mag gelukwens met hul verjaarsdae.
Marietjie le Clus het haar geliefde moeder, Elizabetha Sussanna Groenewald, laas voor die begin van die inperking gesien.
Sus of Bettie – soos talle by Vriendskaptuiste haar noem – sal op 11 Junie haar 90e verjaarsdag vier. Sy sal waarskynlik ook een van talle bejaardes wees wat nie dié spesiale dag saam met haar kinders, kleinkinders of agterkleinkinders kan vier nie.
“Die koronavirus hou ons weg van haar af. Dit breek ons harte. Ons mis haar baie,” het Marietjie vertel.
Weens die streng reëls wat van toepassing is op besoeke aan veral bejaardes in die inperkingstyd het Marietjie die volgende boodskap vir haar ma.
Baie geluk met Moeder se 90e verjaarsdag. Mag ons Hemelse Vader ma ryklik seën met gesonde en vreugdevolle jare. Ons is baie lief vir Moeder.”
Mev Groenewald het vier dogters en twee seuns (waarvan een oorlede is), 15 kleinkinders, en nog meer agterkleinkinders.
Volgens Marietjie woon haar ma haar lewe lank in Randfontein. Sy was ‘n Rapportryer-leerder en is ook in Randfontein getroud.
Die Herald wens graag vir mev Groenewald ‘n gelukkige 90ste verjaarsdag toe.
