Waterpan Stalle hou boeresport!
Mense het van oraloor gekom om boeresport, 'n perdewedren en 'n dag in die buitelug saam met Waterpan Stalle en hulle families te geniet.
Mense het van oraloor gekom om Waterpan Stalle se boeresportdag op 26 Oktober te geniet. Daar was boeremusiek, toutrek en eiergooi, asook ‘n perdewedren.
“Die boeresportdag word gehou om ons liefde vir perde en boeresport vir die gemeenskap te wys,” het Abel Erasmus, een van die organiseerders verduidelik.
Die byeenkoms word vier keer ‘n jaar gehou om almal in die omgewing bewus te maak van al die diere en die buitelewe.
Die jong klomp was gretig om tou te trek, en dit was die dogters teen die seuns. Die seuns het baie hard probeer, maar die dogters het hulle onderstebo getrek!
Volgende was dit die vroue teen die mans, en al het al die vroue alles ingespan, kon hulle nie die mans ‘n les leer nie.
Na die perdewedren wat deur Leandri du Plessis en haar perd Solar Quest gewen is, is daar eiers gegooi. Oud en jonk het deelgeneem en daar was later ‘n paar deelnemers wat behoorlik besmeer was.
Die organiseerders sê graag baie dankie vir almal se ondersteuning.
