Laerskool Rapportyer het onlangs een van sy suksesvolste revues tot nog toe aangebied.
Met Sterre as die tema is daar vir sewe aande vertonings gehou, wat volgens skoolwoordvoerder Roleen Olivier almal volbespreek was.
Spesifiek op Vrydag, 6 September was nagenoeg 1 100 kinders en ‘n handvol personeellede op die verhoog te sien.
“Voordat Rappies Sterre kon aanbied is daar ure se geduld, beplanning, oefening, volharding en kreatiwiteit ingesit. Ons is baie trots omdat ons sewe aande voor ‘n vol saal kon optree. Almal by Rappies het baie hard gewerk.
“Ons bedank almal – van dié wat dansies beplan het tot dié wat vir die dekor gesorg het. Sonder ons ouers en kinders se heelhartige ondersteuning en pragtige samewerking sou ons nie so suksesvol kon wees nie.
“Sterre is nog ‘n voorbeeld van ongelooflike spanwerk. Dit is so deel van Laerskool Rapportryer se verhaal as ‘Wenners vir môre’!”
