Inwoners van Have a Heart Care Centre is op Saterdag, 20 Julie bederf met ‘n vertoning deur sanger Marlé Fourie en ‘n besoek deur die skoonheid Anica van der Westhuizen.
Anica is die huidige Mej Junior Randfontein en Marlé is ‘n gesoute kunstenaar van Krugersdorp wat reeds 14 jaar optree.
Hul teenwoordigheid het ook as ‘n fondsinsameling gedien en was die openingsfunksie van die sentrum.
Volgens Andre Smith, funksiekoördineerder en inwoner van Have a Heart Care Centre is dit maar die begin van die lang lys van vermaak wat vir die bejaardes beplan word.
“Die inwoners het dit beslis geniet en ons beplan ‘n braaidag iewers in September met Marlé wat weer gaan optree, en dan gaan ons ook vir motorfietsklubs vra om vir ons te kom kuier.”
Die sentrum is ‘n niewinsgewende organisasie en het eers onlangs Randfontein toe verhuis nadat hulle ‘n perseel in die Roodepoortse middestad gebruik het. Hulle huisves tans 13 inwoners.
Volgens Marius Oelefse, die stigter van Have a Heart Care Centre het hul verskeie probleme in Roodepoort ervaar en dus besluit om Oosterplotte toe te trek. Die sentrum bestaan net meer as drie en ‘n halfjaar.
Marlé het die publiek aangemoedig om na al die bejaardes aan die Wes-Rand uit te reik en hulle te koester.
“Daar is baie oumensies op straat. Kom ons help en kyk na ons oumense, want ‘n dorp het hulle nodig.”
