Die grootskool is ‘n groot aanpassing vir enige Graad 1’tjie, daarom het Laerskool Randfontein (Ram) op Dinsdag, 8 Januarie hul nuwe Graad 1’s tydens ‘n spesiale seremonie verwelkom.
Volgens Annie Nolan, Ram-woordvoerder het hulle vanjaar 205 Graad 1’s by Ram verwelkom. Daar is ses Graad 1-klasse.
“Ons het ‘n dag voor die skool begin die nuwe Graad 1’s en hul ouers genooi om die skool en onderwysers te leer ken sodat die eerste amptelike skooldag nie so ‘n groot skok is nie en hulle nie deur die teenwoordigheid van die ouer kinders geïntimideer word nie.
Tydens die verwelkomingseremonie het al die nuwe leerders hul vingerafdrukke op hul Ram-paspoort gedruk, elkeen het ‘n atletiekhempie gekry en die hoof het elkeen persoonlik met die hand gegroet,” het Annie gesê.
Daarna het die leerders onderdeur ‘n boog van geel en groen ballonne geloop.
“Dit beteken hulle is nou volwaardige Rammies. Hulle sal aan die einde van hul Graad 7-jaar weer onderdeur die boog stap wanneer hulle van die skool afskeid neem.”
Daarna het die leerders na hul nuwe klasse gegaan waar hulle ‘n bietjie geleer het voordat hulle pouse gehou het.
Volgens Leon Haupt, Ram-skoolhoof was hulle baie opgewonde om die groot groep leerders by die skool te verwelkom.
“Deesdae is Graad 1 nie meer so ‘n groot aanpassing vir leerders soos in die verlede nie juis omdat so baie van hulle in Graad R was. Dié groep Graad 1’s is gereed vir die skooljaar en ons hoop hulle gaan baie gelukkig in die skool wees,” het hy gesê.
Het jy dalk meer inligting rakende dié storie? Stuur gerus vir ons ‘n e-pos na randfonteinherald@caxton.co.za (onthou asseblief om jou kontak besonderhede by te voeg) of skakel ons by 011 693 3671.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes
Roodepoort Record
Krugersdorp News
Get It Joburg West Magazine
Besoek ook ons Facebook, Twitter en Instagram blaaie om jou stem te laat tel!
