Lede van die Mac’s Randfontein-motorfietsklub het op 29 Julie kos, klere en komberse geskenk aan kinders wat uit hul ouerhuise verwyder is.
Volgens Pieter de Witt, Mac’s Randfontein-president, het hulle gehoor dat dié kinders in ’n Randfonteiner se sorg geplaas is, en hulle het besluit om die huishouding te help waar hulle kan.
“Kinders is Mac’s Suid-Afrika se grootste prioriteit en ons organisasie ondersteun die Leave The Children Alone Foundation (LTCAF). Ons tak het besluit dat ons plaaslike kinders ook graag wil help,” het Pieter gesê.
“Die vroue van Mac’s Randfontein-lede het die kos, klere en komberse ingesamel. Die skenking was nie eenmalig nie, ons gaan betrokke bly en help waar ons kan. Hier is ook ander kinderorganisasies in die dorp vir wie ons wil help.”
Vyf van die kinders wat in die pleegpa se sorg geplaas is, was teenwoordig tydens die oorhandiging van die donasie by die Soap Suds-karwasplek naby Spur. Simone de Witt, Mej Randfontein Snr Ambassadeur 2018 asook Johnny Benecke, adjunkpresident van Mac’s Randfontein en ander lede van die motorfietsklub was ook teenwoordig.
“Ons het elkeen van hulle vir ’n rit op ons motorfietse om die parkeerterrein geneem en hulle het dit baie geniet,” het Pieter bygevoeg.
Die pleegpa asook die kinders wat in sy sorg geplaas is, se name word weerhou omdat die bekendmaking daarvan nie in hulle belang is nie.
Het jy dalk meer inligting rakende dié storie? Stuur gerus vir ons ‘n e-pos na randfonteinherald@caxton.co.za (onthou asseblief om jou kontak besonderhede by te voeg) of skakel ons by 011 693 3671.
Vir daaglikse gratis gemeenskapsnuus aan die Wes-Rand, besoek ook ons susterkoerante se webtuistes
Roodepoort Record
Krugersdorp News
Get It Joburg West Magazine
Besoek ook ons Facebook, Twitter en Instagram blaaie om jou stem te laat tel!
